සම්පූර්ණයෙන් ප්රතික්ෂේප කළ යුතු ගල්අගුරු රැගත් නෞකාවක් කොළඹ වරායට ආසන්න මුහුදු සීමාවේ නැංගුරම් ලා ඇති බව ෆ්රී ලෝයර්ස් සංවිධානය පවසයි.
නිවේදනයක් නිකුත් කරමින් එම සංවිධානය පෙන්වා දෙන්නේ පසුගිය අප්රේල් 30 වන දින අදාළ ගල් අගුරු නෞකාවේ පැටවුම් වාර්තාවේ පිටපත් ගල් අගුරු සමාගමේ සියලු නිලධාරීන් හා බලශක්ති අමාත්යාංශ ලේකම් ඇතුළු පිරිසක් වෙත යොමු කර ඇති බවය.
එම පැටවුම් වාර්තාවට අනුව අදාළ ගල් අගුරු නෞකාව දකුණු අප්රිකාවේ රිචර්ඩ් බේ කෝල් ටර්මිනල් වරායේ සිට මෙරටට පැමිණ ඇති අතර එහි ගල් අගුරු මෙට්රික් ටොන් 59,766ක තොගයක් පවතින බව සඳහන්ය.
එමෙන්ම අදාළ ගල් අගුරු තොගයේ අළු ප්රතිශතය ඒකක 16.8ක් වන බැවින් ලංකා ගල් අගුරු සමාගම ඉදිරිපත් කළ ටෙන්ඩරයේ අගය ලෙස දැක්වෙන ඒකක 16 ඉක්මවා යනු ඇත.
ඒ අනුව අදාළ තොගය දඩ මුදලකට යටත්ව හෝ මිලදී ගැනීමේ හැකියාවක් ගල්අගුරු සමාගමට නොමැති බව ෆ්රී ලෝයර්ස් සංවිධානය නිකුත් කළ නිවේදනයෙන් අවධාරණය කර ඇත.
මේ සම්බන්ධයෙන් අද දෙරණ සමඟ අදහස් පළ කරමින් බලශක්ති අමාත්ය මහාචාර්ය අනුර කරුණාතිලක මහතා ප්රකාශ කළේ, අදාළ ගල් අගුරු තොගය ප්රමිතියෙන් බාල වුව ද එය නොරොච්චෝලේ ගල් අඟුරු බලාගාරයේ විදුලි උත්පාදන කටයුතු සදහා භාවිත කිරීමට හැකියාව පවතින බවය.
ටෙන්ඩර් පටිපාටියට අනුව ප්රමිතිය සම්බන්ධයෙන් පවතින ගැටලුවට අදාළව නීතිමය ක්රියාමාර්ග ගැනීමට මේ වන විටත් පියවර ගෙන ඇති බව අමාත්යවරයා කියා සිටියේය.
අදාළ නෞකාව සම්බන්ධයෙන් විවිධ සංවිධාන දේශපාලන අරමුණු වෙනුවෙන් අසත්ය ප්රකාශ සිදු කරමින් සිටින බව අනුර කරුණාතිලක අමාත්යවරයා වැඩිදුරටත් සඳහන් පැවසීය.
