සයිබර් අපරාධ සිදුකරන්නට රට තුළට රැගෙන එන්නට ඇතැයි සැක කෙරෙන දුරකථන තොගයක් සමඟ චීන ජාතිකයින් තිදෙනෙකු කටුනායක ගුවන්තොටුපොළේ දී රේගු නිලධාරීන් විසින් අත්අඩංගුවට ගෙන තිබේ.
රුපියල් 5,140,000ක් වටිනා දුරකථන සහ ඒවා සඳහා භාවිතා කෙරෙන බැටරි තොගයක් රේගු භාරයට ගෙන ඇත.
අදාළ දුරකථන නීතිවිරෝධීව මෙරටට රැගෙන විත් හරිත මාවත ඔස්සේ පිටකර යැවීමට උත්සාහ කිරීමේ දී අදාළ චීන ජාතිකයින් තිදෙනා අත්අඩංගුවට පත්ව තිබේ.
එලෙස අත්අඩංගුවට ගෙන ඇත්තේ, 34 හැවිරිදි චීන කාන්තාවක් සහ 35 හැවිරිදි වියේ පසුවන චීන ජාතික පිරිමි පුද්ගලයින් දෙදෙනෙකි.
එක් චීන ජාතිකයෙකුගේ සැකකටයුතු බෑගයක් පරීක්ෂා කිරීමේ දී ටොෆි සහ චොක්ලට් අතර තිබී ජංගම දුරකථන කිහිපයක් සොයා ගෙන ඇති අතර, පසුව කළ සෝදිසියේ දී ඔහු ඇද සිටි ඇඳුමට යටින් විශේෂයෙන් සකස් කළ ජැකට්ටවක් තුළ ද තිබී තවත් ජංගම දුරකථන කිහිපයක් සොයා ගෙන ඇත.
මේ අතර, චීන ජාතික කාන්තාව පැලඳ සිටි පාවහන්වල මේස් තුළ සහ අනෙක් චීන ජාතික ගුවන් මගියාගේ ගමන් මල්ල තුළ ද තිබී ජංගම දුරකථන 87ක් සහ ඒවාට යොදන බැටරි 140ක් සොයා ගෙන තිබේ.
කටුනායක ගුවන් තොටුපොළ රේගු නිලධාරීහු මොවුන් තිදෙනා අත්අඩංගුවේ තබා ගෙන මේ පිළිබඳ වැඩිදුර විමර්ශන කටයුතු සඳහා අදාළ පොලිස් නිලධාරීවරුන් වෙත භාරදීමට පියවර ගනිමින් සිටී.
